أحنا جيــل الأيموشــن :D

ليس من الجديد أن يأتي كاتبا أو مقاليا ويتحدث عن جيل ، ولكن الجديد هو الجيل ده ، وهتلاحظوا إني حولت كلامي للعامية لأني مش بتكلم عن جيل سعد زغلول ، إحنا بنتكلم عن جيــل الأيموشنز :D

الأيموشن فكرة بدأت مع ظهور مواقع التواصل الاجتماعي وانتشارها ، فكرتها بسيطة ، انك لما بتتكلم بتأكد إحساسك الداخلي بأيموشن

يعني لو مبتسم هاتعمل كده :)

 ولو بتكركر من الضحك أو في موقف لا تحسد عليه هاتعمل كده :D

 ولو بتغيظ حد هاتعمل كده :P

 ولو حزين هاتعمل كده L

ولو متعصب هاتعمل كده :@

و ايموشنز تاني كتير

بس فكرة المقال مش إني أتكلم عن كل أيموشن بيدل علي إيه ، فكرتي هنا إني أوجه الضوء علي الجيل صاحب (الخلق الضيق) ، اللي كسل يكتب انه مبسوط راح حاطت أيموشن ، جيل لما أتخنق من الملل والحكومة مع بعض راح عامل ثورة وكأنه بيفكر في دوري بلايستيشن ، أو كأنه مسافر رحلة لشرم مثلا ، اللي اخدت بالي منه كمان أن الجيل ده بالذات مفيش حاجة صعبة عليه

نفس الجيل اللي أتربي علي مازنجر وكابتن ماجد وماما نجوى ، هو نفس الجيل اللي كسر كل الأقفال وحطم كل القيود ، ونفض لكلمة مستحيل ، وطلع لسااانه للخوف ، عشان كده ، لازم يكون الجيل ده ليه محور اهتمام كبيير من كل المختصين والدارسين والباحثين والباحصاد كمان :D

لازم نفهم فعلا انه جيل قوي ، وقوي جدا كمان ، وان قوتنا فعلا في افتكاستنا ،

حتي المصطلحات اللي استخدمها الجيل ده محدش عرف يفهمها غيره ، لأنه طالما الموضوع عاوزينه مهم فحت كده ، يبقي لازم كمان تعاملنا معاه يكون جااامد تنين

الجيل ده مش جيل (السيس) زى ما بيقولوا ، لأنه مصطلح سيس بيطلق بس علي اللي بيخاف يعصر الطماطم بأيديه عشان متتوسخش ، طب بذمتكم لو إحنا جيل سيس فعلا كنا هانلعب بالقنابل المسيلة للدموع ، ولا هنفكر نقلب كيان أي حكومة مستفزة ، ولا هيكون الشمروخ هو سلاح كتير مننا ، ولا حتي نتريق علي كل اللي ميعجبناش

لأنه كمان الجيل ده مختلف ، هتلاقي فيه المنافقين قليلين قوووي ، لأنه هو صاحب مقولة (ليه أكذب عليك لما ممكن أقولك أنت مالك !)

عشان كده نفسي أقول لجيلي ولو توصية صغيرة وبقوله اهتم بنفسك وتفكيرك ودماغك وشغلها اكتر من كده ، لأنك فعلا تملك مفاتيح متوفرتش لأي جيل تاني قبل كده

وبدي توصية برده للأجيال اللي أكبر مننا وبقولهم خدوا بالكم عشان الجيل ده تفوق علي اجيال كتتتتتتير ، فياريت تحترموا قدراته وعقليته ، وبلاش اسطوانة انتوا صغيرين مشوفتوش حاجة ، لأن لو علي اللي شوفناه ، فالتاريخ يشهد كل جيل شاف ايه و واجهه ازاي ، وأخيرا انا فخوووور جدا اني من (جيل الأيموشنز )

:D

من كتاب : النجاح من منظور مشاغب (قريبا)

كتلة الأفكار