دي حرية شخصية

يا جماعه بعد اذنكم ( دى حريه شخصيه ) .... ياعم ازاى  ؟  * وانتوا مالكوا ، دى حريه شخصيه *

 وانا فى رابعه ابتدائى كان عندى ماده اسمها ( القيم والاخلاق ) قريت فى مره جوه الكتاب بتاعها جمله بتقول 

( انا حر ما لم اضر )

وقتها عجبتنى الجمله رغم انى ما كنتش فاهمها ، كان اللى عاجبنى فيها نطقها ( انا حر مالم اضر ، انا حر ما لم اضر ) والله حلوه الجمله ، فيها تنغيمه كده وعدت الايام والسنين ومع مرور المواقف والشخصيات قدام عينى .. فهمت وقتها يعنى ايه ( انا حر ما لم اضر ) الحريه مش معناها انى اعمل اللى انا عايزه فى الوقت اللى احبه ، الحريه مش انك تدخن وسط ناس مش بيحبوا ريحه الدخان وتقول  * انا حر * الحريه مش انك تسب او تغلط فى حد او بلد وتقول  * ده رايى الشخصى * او * دى حريه شخصيه * صوتك العالى ، المزيكا المزعجه ، السواقه بتهور ، تقول رأيك بطريقه مش كويسه ، الغلط فى الكبير ، كل دى وحاجات غيرها كتير بنعملها تحت شعــــــــار ( دى حريـــه شخصيـــه ) واللى مستغـربـله برده ان نفس الناس اللى بتحب تأخد حقها فى الحريه مش بتفكر او تسأل نفسها سؤال : لو العيله او الدوله او المجتمع او الدين والعرف ادولك المساحه اللى ترضيك من الحريه كانوا يقصدوا ايه او كانوا عايزين منك ايه ؟؟؟ عايزين مسؤليات ، تحمل مسؤليه ، لما بتعبر عن رأيك بيبقى الغرض مش انك تعبر وخلاص او ترغى ومحدش يسمع ، الغرض انك لما تقول رأيك يتناقش ويتوجد الحلول ،،،، الحريه انك تتحمل مسئوليه كلامك ، فكرك ، رأيك ، تصرفك .عشان كده فكر كويس قبل ما تستخدم حريتك وشوف هتفيد مين ، وهتضر مين فكــــــــــــــــــــــــر كويــــــــــــــــس

كتلة الأفكار

12/10/2010