قصة القلم الأبيض

قلم ابيض 

يا نهار ابيض 

من وسط كل الأقلام

طلعلي قلم ابيض 

ومطلوب اني اكتب بيه

علي ورق ابيض 

طب ازاي الكلام يبان 

وازاي الحدوتة تكمل 

بقلم ابيض 

بس الأختبار كان اجباري 

والأختيار برده اجباري 

يا قلم ابيض 

يا قلم ابيض 

فللأسف مسكت القلم 

وبدأت أكتب 

تخيل معايا ممكن اكتب ايه 

وابدأ ازاي واوصل لأيه 

ماهي المشكلة اني حتي 

لما اكتب 

مش هاعرف وصلت لأيه 

عشان اكمل عليه 

ايه يا رب الحيرة دي 

مكانش في اختيار تاني 

او قلم تاني 

طب حتي كانوا يدوني ورق 

مش ابيــــض 

بس مفيش مراقب 

جاتلي فكرة 

انا مكتبش حاجة 

واودي الورقة واقول خلصت 

وابقي خلــــصــت 

م الموقف اللي انا فيه 

بس يا تري هاكون قدام نفسي 

ايــــــــــــــــه !!!!!

ايه التلعبيكة دي 

ما هما اللي مصعبينها 

وجايبيين ورق ابيض 

وحظي الهباب كمان زودها 

و وقعني ف قلم ابيض 

يعني مش كفاية ان حياتي مفيهاش 

ولا لـــون ابيض 

ويوم ما اجي الونها يكون القلم ابيض 

طــب وبعدين 

شكل القصة مش هاتكمل 

تكمل ايه يا شيخ اتنيل 

هي بدأت اصلا ! 

طب ابص كده ع اللي جمبي 

اشوفه وصل لفين 

ايـــــــه ده 

ازااااااااااااااااااااي 

مش معقول 

ده هوا كمان معاه قلم ابيض 

وفي نفس حيرتي ومستغرب 

طب ابص ع اللي جنبه 

برده القلـــم ابيــــض 

طب اللي جنبه 

واللي جنبه 

طب اللي قدام 

اشوف كده اللي ورايــــــــا 

ده اللجنة كلها ورقها ابيــــض 

وكلهم معـــاهم نفس القلم الأبيض

استنوا كده ، هو ايه الحــظ النيــلة ده 

كلنا ف نفس الموقف الأبيـــــــض 

معانا ورق ابيض 

وماسكين قلم ابيض 

روحت واقف بكل زهـــو 

وقلت انا خلصت 

وكل اللجنة خلصت 

حكايتها مع القلم الأبيض 

ولما خرجت م اللجنة 

لقيت كل الناس مدايقة 

اصلهم كان معاهم قلم ابيض 

ومعرفوش يكتبوا ف الورق الأبيض 

الموضوع مش محتاج قلم ابيض 

الموضوع ممكن يكون صــــامت 

ويحكي الف معني وكلمة 

مش لازم يتكتب 

ولا لازم تشتم حظك 

عشان وقعك ف القلم الأبيض

بصلها بشكل تـــاني 

هتلاقيها ان ربنا خلق كل اقلامنا بيضا 

عشان نكتب ب أفعــــالنا 

حكايات متتكتبش 

ولما نفكر نكتبها و منستفدتش منها 

يكــــــــــــــــون القلـــم ابيــــــض 

استفيد من قصـــتك 

واعرف انك مش لوحدك 

اللي اتولدت بقلم ابيـــــض 

ودي كــانت حكايتي 

مع القلم الأبيض :) 

كتلة الأفكــــــار 

18 / 3 / 2013 

انا مبحبش التنمية البشرية 2

ومع أول يوم ف التدريب .....

لقيت الموضوع غريب ، علي الأقل بالنسبة لي ، كان التدريب عن مهارات التواصل والقيادة ، وكنت اصــغر شخص موجود ف القاعة ، كل اللي يشوفني يبصلي بأستغراب كده كأني كائن فضائي هبط علي الأرض ، اول ما دخلت اخدت كتيب الماتريال وقعدت مكاني ، وبدأ التدريب بفيديو يعرف د / ابراهيم الفقي ، ومع مرور دقايق لقيت اني بحضر لشخص انجازاته كبيــرة جداااااا ، ومن كلام الناس ف الفيديو وانه غير حياة ناس كتــير ، حسيت ان الموضوع فعلا ممكن يكون مش أهبل ، ومع بداية التدريب ، بدأ د/ الفقي يتكلم ، ومع مرور الوقت بدأت انجذب للموضوع ، حسيت انه بيتكلم عني ، عن المواقف اللي مريت بيها ف حياتي ، ما بين نجاحات واحباطات ، فشل وضيـاع ، الفترة اللي حضرت فيها التدريب كنت تقريبا شخص بيقفل حياته من قبل ما تبتدي ، شخص مش ف دماغه اي حاجة ولا عاوز اي حاجة ، شخص الدنيا كلـــــــها سووووواد بالنسبة له ، بس مع مرور ايام التدريب ، لقيت ان الدنيا مش كلها سواد ، لقيت ان الحياة بس محتاجة ترتيب ، مع بداية اليوم التاني كنت بدأت يبقي عندي شغف اعرف هو هيقول ايه ، بدأت معاه احدد اولوياتي ، وحياتي ممكن يكون شكلها ازاي من جديد ، بدأت ابعد عن السلبيات اللي حواليا ، بدأت الاقي شخص جديد جوايا ممكن يبدأ الحياة من جديد ، ومن هنا فهمت فايدة ومعني التنمية البشرية ، فهمت ان مش زي اللغات ولا الكمبيوتر ، هي حاجة اهم منهم ، لأن لو اللغات والكمبيوتر بيعرفوا الشخص معلومات ومهارات ، ف التنمية البشرية بتعرف الشخص هو مين اصلا ، وبعد ما التدريب خلص اتفاءجت بأن المكان اللي عامل التدريب بيكرمني علي اني أصغر متدرب ف القاعة ، ومن هنا بدأت حياتي بشكل جديد ، بدأت ابص ع الجوانب الأيجابية ، بدأت احضر اكتر واكتر لنوعية التدريبات دي ، ولأنها علمتني الاقي نفسي ، بدأت معاها اشوف ايه هي اهتماماتي ، لقيت اني شاطر جدا وبحب جدا التسويق ، اهتميت بيه واتعلمت فيه كتيــر جدا وبدأت امارسه ، لقيت اني بحب الكتابة ، بدأت اكتب ، لقيت اني بحب اساعد الناس ، بدأت العمل التطوعي ، ومع مرور الوقت ، لقيت حياتي بتتحسن ، مش عشان مبقاش فيها احباطات ، بس عشان لقيت نفسي بعرف اتعامل مع الأحباطات دي ، مش عشان مفيهاش فشــل ، بس عشان اتعلمت ازاي اتعامل مع الفشل ، اتعلمت اشوف جوانب حياتي وانميها ، ومن هنا ، عرفت ازاي احب التنمية البشـرية ، ومع مرور الوقت ، بدأت كمان اعرفها للي حواليا ، لأني متيقن جدااااا من جوايا ، ان التنمية البشرية هي بداية الحيـــاة ، خلاصة الموضوع ، اني شخص زي اي شخص عــادي ، مكانش بيحب التنمية البشرية ، بس لما فهمها ، حبها ، و درسها ، وعلمها للي حــواليــــــــه ، وعشان كده ، لازم دلوقتي لو بتقول انك مبتحبش حاجة ، اعرف عنها الأول ، واعرف هي ممكن تفيدك ازاي وتعلمك ايــــــــه ، اعرف جوابنها ، سلبياتها وايجابياتها ، اعرف حياتك ممكن تبقي عاملة ازاي ف وجودهــا 

اعرف انك انســان ، اتخلقت عشان تتعلم ، مش بس تنتقد وانت مش فـــاهم 


لذلك ، انا بحب التنمية البشــــــــــرية ، وبحبها جداااا كمــان 

كتلة الأفكــار 


12 - 3 - 2013 

 

 

انا مابحبش التنمية البشــرية

فـــــــــــــــــــــــي بـــــــــداية
نزولي لسوق العمل ، كان عمري تقريبا 12 سنة ، من وقتها ومن قبلها كنت دايما اشوف ف البيت وف ادراج والدي كتب لواحد أسمه إبراهيم الفقي عن حاجة كده اسمها التنمية البشرية ، وقتها انا كنت اقري عن الألغاز ، القصص القصيرة ، بس ايه التنمية البشرية دي ، ولما كنت امسك الكتب واقراها ، احس ان في عبط موجود في الكتب دي ، يعني ايه حد يقولي اتواصل مع الناس ، ويعني ايه احدد هــدفــي ، ايه الكلام الفاضي ده ، كنت حاسس انه مجال أهبــــل ، وبعدها بفترة بدأت اشتغل ف التسويق ، اللي كنت فاكره دعاية نظرا لأني مدرستوش ، ومن خلال الشغل اخدت دور عضو تنظيم ف أحد مؤتمرات التوظيف ف الصعيـد ، وكان الموضوع بسيط ، اقعد ع المكتب اسلم الأبلكيشن واستلم ال CV ، المهم يا سيدي كل ما ابص في CV او ابلكيشن ، الاقيهم واخدين كورسات ف حاجة اسمها التنمية البشرية ، انا ياخويا اعرف كورسات E ، كورسات كمبيوتر ، ICDL ، سياحة وفنادق ، انما ايه جو التنمية البشرية ده ، يعني اروح واضيع من وقتي وفلوسي عشان اقعد اسمع حد يقولي انت كويــــــــــس O.o ايه المنطق الغريب ده ، لا والأدهـي كمان ، اني اخد فيها تدريب ، وليه شهادة ، يعني أهبل بيحضر حاجة هبلة عشان ياخد شهادة هبــلة ، مع الوقت والشغل بدأت احتك بناس بتقول انها واخدة تدريبات في التنمية البشريــة ، ومجالات تاني ، بس انا المجال اللي كان شاددني اعرفه هو ده ، عشان اعرف اتريق عليه بــس :D وفي ذات يـــوم ،دار الحوار التالي بيني وبين والدتي  

والدتي : د/ابراهيم الفقي نازل أسيوط !

انا :  بتاع الكتب الهبلة اللي ف درج بابا ده !!

والدتي : ما انت عشان مش فاهم بتقول كده ! 

انا : هاااار بتنجاني ، حتي انتي يا امـــاه ، فقولتلها بنبرة مفيهاش اي جدية ، طب وانا ينفع اروح احضر ولا مرتبط بسـن ؟

والدتي : لا ممكن تحضر وممكن كمان ادفعلك فلوس التدريب

 انا :  ليه هو غالــي يعني ؟

والدتي :  500 جنيه !

انا : هااااار اسووود ، اروح اسمع كلام اهبل ، ب 500 جنيه !!!! :O قولتلها لو هتدفعيهم انتي انا معنديش اي مشكلة ، مهو مش من جيبي :D 

المهم حجزتلي ورقمي كان 500 وشوية ، يعني فيه قبلي تقريا 500 واحد حاجزين ، ده معناه حاجة من الأتنين  ، يا اما الموضوع مش اهبل ، يا اما الناس كلها اتجننت ! ، بس قررت اروح واشوف .. واتريق ، ومع أول يوم ف التدريب .....

هاكملكم المقـــال اللي جـــــــــــــــــــــــــاي 


كتلة الأفكار 
3 / 3 / 2013